خوش آمدید

جستجو

تبلیغات





صمد دایی اوغلومون تویو

    صمد دایی اوغلومون تویونا هامی گلمیشدی ، چوخدان گؤرمه دیییمیز قوهوملاردان دا گلن وار ایدی . نادر خالا اوغلوم دا اوردایدی ، ماشاللاه اولسون ایدمان یاپدیغینا گؤره بیلکلری منیم بوینومدان یوغون ایدی ! اونو دا چوخداندیر گؤرمه میشدیم . توی باشلادی ، آشیقلار چالیب اوخویور ، قوناقلار دا اللریندن گله نی خرجله ییرلر . من ده او بیری قوناقلار کیمی آشیغا انعام وئریب یوخسا اوینایانلارین باشینا پول سپیپ ، صمد دایی اوغلومون شادلیغیندا شادلیق ائدیردیم .

    گئجه نین سون چاغلاریندا سیرا بی بزنمه یه چاتدی . بیه ساغدیش _ سولدوش سئچیردیلر ؛ کراواتیمی برکیدیب گؤزوم حاجی داییمین آغزیندایدی کی منی چاغیرسین ! حاجی داییم گولومسه یرک دئدی : « سولدوش بیین خالا اوغلوسو صادیقدیر ، ساغدیش دا ... » _ اوره ییم آدیمی ائشیتمه یه چیرپینیردی ! _ « ساغدیش دا بیین بی بی اوغلوسو نادیردیر ! »

    « نادیر ؟ اوغلان خلقین شانسی وار هااااااااااااااا ! عؤمرونده بیر دؤنه تویا گلدی تئز ساغدیش دا سئچیلدی ! من ده هر کیمین تویونا گئدرم باشماق جوتله ین اولارام ! » اؤز _ اؤزومه دئدیم . آما ایش _ ایشدن سوووشموشدو ! بی ساغدیش _ سولدوشو ایله مجلیسدن چیخیب ، بزنمه یه گئتدیلر ! بیر آزدان سونرا صادیق ایله نادیر ، صمد دایی اوغلومون ساغ _ سولون توتوب مجلیسین یوخاری باشینا گلدیلر ! توی قورتولانا کیمی یئنه ده پول ایدی کی خرجله ییردیم ! آشیق بیین بویونا اوخشایارکن بیین یاخینلاریندان آد آپاریب ، انعام وئرمه یه چاغیریردی ! « آللاه انعام وئره نه وئرسین عوض ... تویدا پول خرجله ینده اولماز غرض ... هامی انعام وئریب قالیب ابیلفض ... ابیلفض ده انعام وئرسین وار اولسون ... ! » آشیق منیم آدیمی سسله دیکده شیشه _ شیشه آیاغا قالخیب الیمی جیبیمه سالدیم ! دده م وای ... ننه م وای ! هر نه ییم وار ایدی آرادا خرجله میشدیم ! شالوار جیبلریم ده یئل اسیردی ، الیمی کؤینک جیبیمه سالدیم ، جیبیمین ترکیندن تر ایچینده اپریلمیش بیر مین تومنلیک تاپیب ، الیم اسه _ اسه آشیغا طرف توتدوم ! اؤز _ اؤزومو دانلیردیم : « اوغلان ! به فیکرین هاردا ؟ ایندی تویدا مین تومنلیک خرجله مه زامانیدیر آخی ... ؟ » آما آشیق جماعت ائلدار و بیلگین اینسانلار اولار . اوزونه گتیرمه ییب مندن ایکی بیت شعر ایله تشککور ده ائله دی !

    تبریزه قاییتماغا داها پولوم دا قالمامیشدی ! کیمه آغیز آچیب ، پول بورج ائتمک فیکرینده یدیم کی بیر زاد یادیما دوشدو ؛ بیزیم تویلاردا کیمسه ساغدیش _ سولدوشدان گیزلین بیین باشماغین ، جورابین ، گولون آنجاق هر نه یین گؤتوره بیلسه ، بیین آتا _ آناسی ، داییسی ، عمیسی و ایستکلی قوهوملاریندان انعام آلیب ، اونو بیه قایتارار ! البته ساغدیش _ سولدوش دا سحر آچیلیب ، بیی چؤله آپارانا کیمی گؤزده قولاقدا اولارلار کی کیمسه اونون هئچ زادین گؤتوره بیلمه سین !

    منیم باشقا چاره م یوخ ایدی ! یا گرک بیریندن میننت ایله پول بورج آلایدیم یا دا کی بیین بیر زادین گؤتوروب ، میننتسیز و آلینی آچیق انعام قازانیب یول کرایه می اوردان چیخاردایدیم ! بی اولان اوتاغا گئتمک ایچین حیطه چیخدیم . بیین بی بی سی کی منیم ده خالام اولار ، حنا الینده بی اولان اوتاغا ساری گئدیردی !

    _ خالا هارا گئدیرسن ؟

    _ بو حنانی بیه آپاریردیم اللرینه قویسون ! گل ائله اؤزون زحمتین چک ! آللاه سنه ده توی قیسمت ائله سین اینشاللاه !

    حنانی خالامین الیندن آلیب بی اولان اوتاغا گئتدیم ! « یا آللاه ...یا آللاه ! » سسیمه نادیر خالا اوغلوم قاپی یا چیخدی ! منی حنا الیمده گؤروب « به به ! ابیلفض خالا اوغلودور اوشاقلار ! » دئییب منی ایچری آپاردی ! هره بیر آز حنادان گؤتوروب اووجونون ایچینه یاخیردی ! من ده سکینه دایقیزیمین عشقینه حنا ایله اووجومون ایچینده « S » یازدیم کی قورویوب رنگی اووجوما چیخسین ! آخی سحر چاغی الیمین حناسین یوواندا اونون آدینین ایلک حرفی اووجومون ایچینده بیلینه جه یدی ! حتمن او دا اووجونون ایچینده منیم آدیمین ایلک حرفین حنا ایله یازیب کی سحر یوواندان سونرا اوزاقدان اوزاغا بیر بیریمیزه گؤسترک ! حنانی الیمه قویوب نقشه می یئرینه یئتیرمه یه باشلاییب ، نادی خالا اوغلومون قولاغینا پیچیلدادیم : « نادیر ! بیین باشماغین منه وئررسن ؟ »

    _ نئیلیرسن ؟

    _ ایستیرم آپارام گؤرم بیی نقدر ایسته ین وار ؟ هره سیندن بیر آز انعام کسم دااااااااااااا !

    _ سن اؤله سن خالا اوغلو ! نه باشماغی ؟ نه انعامی ؟ من اؤلموشم کی سن بیین باشماغین آیاغیندان چیخارداسان ؟

    گؤردوم نادیر ایله باشماق شوخلوغو توتمایاجاق ! الیم بو نقشه دن ده اوزولموشدو کی آغلیما بیر زاد گلدی ! « اوغلان ! سنین اؤز باشماقلارین بیین باشماغیندان همی باهالی همی ده تازادیر ! ائله اؤز باشماغینی آپار ، دئ بیین باشماغیدیر ، بیر آز انعام ییغ ! » بو فیکیردن سونرا آیاغا قالخیب ، اوتاقدان چیخدیم . اؤز باشماغیمی گؤتوروب بیین آتا ، آنا ، عمی ، داییسینا گؤستریب ، هره سیندن بیر آز پول قوپاردا بیلدیم ! دئدیلر گئت بیین بؤیوک بی بی سیندن ده انعام آل !

    _ سلام بیین بؤیوک بی بی سی ! آللاه سنین ده سوبایلارینا توی قیسمت ائله سین !

    _ سلام اوغلوم ! بالا دای سنین ده اوزون آچیلیب هااااااااااا ، گرک سنین ده فیکرینده اولام !

    _ آنا ! گئدیب صمدین باشماقلارین گؤتوروب هره دن بیر زاد آلمیشام بیر سن قالیرسان ، سنه آنام اولدوغونا گؤره اوجوز حسابلارام ، سن ده بیر _ ایکی تومن وئر گئدیم بیین باشماقلارین وئریم اؤزونه ! ایستر بیر یئره چیخسین ، گؤرر باشماقلاری یوخدور ، پیس اولار !

    آنام « ائله منیم اوغلومو قویوب ، دوننکی اوشاغی ساغدیش _ سولدوش قویارلار ، بیین باشماغی اوغورلانار » دئیه _ دئیه منه ایکی مین تومن وئریب ، حیرصلی _ حیرصلی بی اولان اوتاغا گئتدی ! آنام بیین اوتاغینا ، من ده چیخیب بیر تاکسی یا ال ائدیب ائوه قاییتدیم !

    پیس اوشاق www.pisushaq.blogfa.com

     

     

     


    این مطلب تا کنون 5 بار بازدید شده است.
    منبع
    برچسب ها : بیین ,انعام ,ساغدیش ,ایله ,خالا ,ائله ,اولان اوتاغا ,بیین باشماغین ,ساغدیش سولدوش ,بیین بؤیوک ,قیسمت ائله ,
    صمد دایی اوغلومون تویو

تبلیغات


    محل نمایش تبلیغات شما

پربازدیدترین مطالب

آمار

تبلیغات

محل نمایش تبلیغات شما

تبلیغات

محل نمایش تبلیغات شما

آخرین کلمات جستجو شده

تگ های برتر